Ātreyatilakam
(pratibimbalakṣaṇam )
namo buddhāya |
ātreyatilake bauddhaśāstre'nyatra purātanaiḥ |
uktaṃ yatpūrvamunibhiḥ pratimāmānalakṣaṇam ||1||
tatsaṃhṛtyeha caikatra piṇḍīkṛtya yathākramam |
natvā sarvavidaṃ devamarccālakṣaṇamucyate ||2||
dvādaśāṅgulitālañca vitastirmukhameva ca |
jñeyamevārca(rcā)nāmetat dvyaṅgulaṃ golakaṃ kalā ||3||
pallavānāṃ caturbhāgo māpanāṅgulikā smṛtā |
tato'ṅgulyaṣṭabhāgena yavaṃ vindyādvicakṣaṇaḥ ||4||
arcānāmaṅga pratyaṅgamāpanārthamiti smṛtam |
anenaiva vidhānena māpayetpratimāṃ budhaḥ ||5||
yatkiñcidrūpakāyāmaṃ vibhajya navabhāgataḥ |
ekatālaṃ mukhaṃ kuryādvistārañca tathaiva ca ||6||
vakārākṛti cūtābhaṃ mukhaṃ khagāṇḍābhaṃ tilākṛti |
sārddhāṅgulavihīnaṃ yattat vakārākṛtīṣyanta (te)||7||
dvyaṅgulena vihīnena cūtābhamānanaṃ bhavet |
sārddhadvyaṅgulahīnaṃ tu khagāṇḍākāramucyate ||8||
varjayettryaṅgulaṃ yattu nāmadheyaṃ tilākṛti |
caturṇṇāmapi vaktrāṇāṃ kapoleṣu vivarjayet ||9||
kevalaṃ tilasaṃsthānaṃ nārīṇāmiṣyate mukham |
aśāstreṇa mukhaṃ kṛtvā yajamāno vinaśyati ||10||
saśāstreṇa mukhaṃ kṛtvā barddhate sahabāndhavaiḥ |
evaṃ śāstrāgamaṃ kṛtvā arcānāṃ kārayedbudhaḥ ||11||
dvītā(go)laṃ śīrṣabhāgañca chatrākāraṃ prayojayet |
aṅgulārddhaṃ dvigolañca lalāṭaṃ parikīrtitam ||12||
tiryyañcaṃ lalāṭasya niyataṃ pañcagolakam |
dvikalo dviyavaścaiva nāsikāyāma ucyate ||13||
dviyavaścāgravistāro niṣkāsaṃ sārddhamaṅgulam |
dvyaṅgulaṃ pārśvayorūrdhvaṃ nāśā(sā)cayayavatrayam ||14||
arddhāṅgulisame vṛtte vaṃśamūle yavadvayam |
śrotasī triyave syātāṃ śaṅkhākṛtisuśobhanā(ne)||15||
iti mānasamāyuktā jihvāpiṇḍī praśasyate |
tilapuṣpasamākārā śukasenamukhopamā ||16||
tryaṅgulaṃ dviyavaṃ tasya adhobhāgaṃ pracakṣate |
ṣaḍyavaṃ bhojakaṃ kuryāduttaroṣṭhaṃ caturyavam ||17||
tribhāgāṅgulikā kāryā gojī(dhiḥ)tasyopariḥ sthitā |
adharaṃ bhojakaṃ tulyaṃ vistāramaṅguladvayam ||18||
niṣkāsaṃ ṣaḍyavaṃ madhye viśvarekhāṃ ca kārayet |
sṛkkaṇīṃ cāṅgulārddhena kiñcinnimnāṃ tu kārayet ||19||
dvyaṅgulaṃ cibukaṃ tiryyagāyāmena yavā daśa |
arddhāṅgulaṃ bhruvormadhye dīrghaṃ pañcāṅgulaṃ bhavet ||20||
yavārddhamānā bhrūrekhā cāpākṛtirakhaṇḍitā |
dvyaṅgulaṃ dviyavaṃ netramāyataṃ tanti(ttri)bhāgataḥ ||21||
locanasya trayo bhāgaṃ (gā)tathā tāraṃ prakīrtitam |
tasya bhāgatrayaṃ kuryādasitaṃ saṃprakīrtitam ||22||
kumudotpalapatrābhaṃ padmapatraṃ jhaṣodaram |
apāṅge dve kale jñeye tetramadhyañca dvyaṅgulam ||23||
karṇau dvyaṅgulavistārau dīrghaṃ tu caturaṅgulam |
pṛṣṭhataḥ karṇaniṣkāsaṃ dvyaṅgulaṃ parikīrtitam ||24||
tuṭikā dvyaṅgulaṃ sampattadarddhā kakunā bhavet |
aṅgulasya caturthāṃśaḥ karṇavartyāstu vistaraḥ ||25||
tri(dvi)yavaiḥ karṇayorguhyaṃ yathāśobhā ca pāśikā |
karttarīmūlasaṃsthānaṃ karṇanālaṃ prakīrtitam ||26||
karṇayorubhayormadhye mastako'ṣṭādaśāṅgulaḥ |
caturdaśāṅgulaṃ pṛṣṭhaṃ lalāṭasya na saṃśayaḥ ||27||
bhrūrekhā netrayormadhye golakaṃ parikīrtitam |
aṣṭāṅgulaṃ bhavenmadhyaṃ cibukākarṇamūlayoḥ ||28||
tathā cibulalāṭaṃ ca kartavyaṃ netrayoḥ samam |
sṛkkaṇī tārakā pārśve samasūtreṇa māpayet ||29||
bhrūrekhā karṇaśīrṣaṃ ca samasūtreṇa tāḍayet |
tuṭikā netramadhyaṃ ca tathaiva samatāḍanam ||30||
dvigolaṃ mukhaniṣkāsaṃ grīvāyāmastathaiva ca |
skandhamūlācchrutermūlaṃ yāvat syāt golakatrayam ||31||
cibukādho yathāśobhaṃ kartavyaṃ māṃsavartana(rtula)m |
tadā lambapramāṇena gṛhinīṃ hrāsayetsanāk ||32||
maulikotha jaṭābandhaḥ kuñcitāśca śiroruhāḥ |
kirīṭi triśikhaṃ caiva mukuṭaṃ khaṇḍameva ca ||33||
teṣāmaṣṭāṅgulaṃ dīrghaṃ kartavyaṃ nādhikaṃ tataḥ |
mukhātā(khadvā)raṃ pravakṣyāmi śubhaṃ vā yadi vā'śubham ||34||
kiñcitprahasitaṃ kuryānmādhuryalavaṇānvitam |
kaṣāyaṃ kaṭukaṃ kruddhamāmlaṃ ca tiktameva ca |
vaktraṃ vedanasaṃsthānaṃ dūrataḥ parivarjayet ||35||
ataḥparaṃ pravakṣyāmi dehānāṃ mānalakṣaṇam |
hikkāto nābhiparyantaṃ dvimukhaṃ kārayedbudhaḥ ||36||
nābhito vṛṣaṇāmūlaṃ tiryyak pārśvau sphicau tathā |
hikkācūcukayormadhye cūcukāntarameva ca ||37||
grīvāpārśvāt bhujāśīrṣaṃ tālamekaṃ prakīrtitam |
nābhicūcukayormadhye bhāgaścaturdaśāṅgulam ||38||
samasūtraṃ ca kartavyaṃ hikkā cāṃsāgrameva ca |
aṃsayormadhyavistāraḥ tritālaḥ samudāhṛtaḥ ||39||
akṣaṃ(pṛṣṭhaṃ)ṣaḍaṅgulaṃ kuryāttathā kakṣastanāntata(ra)m |
ekagolapramāṇaṃ ca cūcukāpārśvamaṇḍalam ||40||
dviyavaṃ cūcukaṃ vṛttaṃ triyavaṃ nābhimaṇḍalam |
nimnā nābhiśca kartavyā dakṣiṇāvartalāñchanā ||41||
tryaṅgulau vṛṣaṇau syātāṃ meḍhraṃ tu caturaṅgulam |
hi(sphi)cāvaṣṭāṅgulādūrdhvaṃ pīnavṛttau suśobhanau ||42||
bhujāyāmaṃ praśaṃsanti tajjñā mukhacatuṣṭayam |
bāhū cāṣṭakalau syātāṃ prabāhū navagolakau ||43||
trigolaṃ karadīrghaṃ taṃ bhāvatī madhyamāṅguliḥ |
kuryād dvigolamaṅguṣṭhaṃ tattulyā ca kanīyasī ||44||
madhyamāyā nakhārddhena hīnā cānāmikāṅguliḥ |
hīnā nakhena vijñeyā madhyamasya pradeśinī ||45||
aṅguṣṭhasya tu vistāraṃ kalpayeta yavā nava |
sārddhamaṣṭayavaṃ tiryak madhyamāyāśca yojayet ||46||
ubhau cāṣṭayavaṃ kṛtvā saptayavā kanīyasī |
kaniṣṭhāmūlato bandhaṃ maṇeḥ pañcāṅgulaṃ matam ||47||
tatpramāṇena jānīyāttiryak karatalasya tu |
aṅguṣṭhamūlato bandhamaṇeryāvad dvigolakam ||48||
aṅguṣṭhamūlāttarjjinyā mūlaṃ sārddhakalaṃ kalet |
aṅgulyastāstriparvāḥ syurdviparvo'ṅguṣṭhako bhavet ||49||
aṅguṣṭhasyāṅgulīnāṃ ca samaparvo vidhīyate |
suvartitāgrasūkṣmāśca susandhāśca prayojayet ||50||
svāṅgulārddhaṃ nakhaṃ tiryak parvārddhadīrghameva ca |
mūle'rddhacandrasaṃyuktaṃ karajaṃ kārayedbudhaḥ ||51||
pāṇiṃ pañcāṅgulaṃ kuryāttatpārśvamaṅguladvayam |
pūrṇaṃ karatalaṃ kuryāt śubhale(re)khopaśobhitam ||52||
hastarekhāṃ pravakṣyāmi devānāṃ śubhalakṣaṇam |
śaṅkhaṃ padmaṃ dhvajaṃ vajraṃ cakraṃ svastikakuṇḍalam ||53||
kalaśaṃ śaśinaṃ chatraṃ śrīvatsāṃśukameva ca |
triśūlaṃ yavamālāśca kurvīta vasudhāṃ tathā ||54||
nābhiguhyakayormadhyenorumūlaṃ samaṃ kalet |
dvivitastyurudīrghatvaṃ jaṅghāṃ dīrghaṃ mukhadvayam ||55||
jānunī dvikale syātāṃ gulphāke(ve)kakalau smṛtau |
dvikalau pārṣṇikau jñeyau pakvabimbaphalākṛtī ||56||
aṅghreḥ saptāṅgulaṃ tiryagāyāmena daśāṅgulam |
caturbhāgena pādasyāṅguṣṭhāyāmaṃ vidhīyate ||57||
tatsamā sūcikā hīnā madhyamā dviyavena tu |
anāmikānakhārddhena hīnaparvā kanīyasī ||58||
aṅguṣṭhasya ca vistāra ekādaśayavaḥ smṛtaḥ |
sūcyaṅguṣṭhakayoragre cāntaraṃ triyavaṃ bhavet ||59||
sūca(cī)navayavā tiryak sārddhāṣṭayavamadhyamā |
anāmāṣṭayavā tiryakkīrtyate mānalakṣaṇe ||60||
bāle cūtakasaṃsthānāvaṅguṣṭhau parikīrtitāḥ (tau)|
kūrmapṛṣṭhasamākāraṃ pādasyopari kārayet ||61||
jalūkapadasaṃsthānā aṅgulyaḥ parikīrtitāḥ |
pādau samatalau kāryau śuktyākārā nakhāḥ smṛtāḥ ||62||
ataḥ paraṃ pravakṣyāmi pariṇāhasya lakṣaṇam |
ṣaṭtriṃśadaṅgulaṃ jñeyaṃ śirasaḥ parimaṇḍalam ||63||
grīvāṣṭāṅgulivistārā triguṇaṃ parimaṇḍalam |
kakṣayormadhyavistārau viṃśatyaṅguliratra tu ||64||
ūna viṃśatikalaṃ kuryātpariṇāhena buddhimān |
bhujayormūlamadhyāgramaṣṭaṣaṭcaturaṅgulam ||65||
svavistārapramāṇena maṇḍalaṃ triguṇaṃ bhavet |
kukṣeśca madhyavistāro jñeyaḥ pañcadaśāṅgulaḥ ||66||
ṣoḍaśāṅgulirasyādhaḥ kaṭiraṣṭādaśāṅguliḥ |
ṣaṭgolamurumūle ca jaṃghāmadhye ṣaḍaṅguliḥ ||67||
jaṅghānte dvikalaṃ vindyādvistāratvena paṇḍitaḥ |
eteṣāmeva sarveṣāṃ maṇḍalaṃ triguṇaṃ bhavet ||68||
tathāṅgulīnāṃ sarveṣāṃ vṛttatvaṃ yatra vidyate |
pṛṣṭhataḥ śīrṣaniṣkāsaṃ kalamekaṃ prakīrtitam ||69||
pṛṣṭhād vaṃśasamaṃ kuryāt sphicau tulyāvalambinau |
ūrū ca piṇḍikā pārṣṇiḥ kuryāttulyāvalambinaḥ ||70||
pṛṣṭhasya lakṣaṇaṃ vindyādetatsaṃkṣepato dvijaḥ |
muktāhārādirasanākaṭakakeyūrakuṇḍalam ||71||
vastrasāṭakavinyāsaṃ śarīrasthaṃ ca kārayet |
athārcānāṃ guṇadoṣau cocyete'dhikahīnataḥ ||72||
dīrghavistārasaṃyuktaṃ dadyātsthānaṃ tu susthiram |
śiraścchatrasamaṃ kāryaṃ dhanadhānyasamṛddhidam ||73||
lalāṭe subhru rekhā ca śāśvatīṃ dadataḥ śriyam |
sukṛtā sā bhavedarcā jāyate sasukhā prajāḥ ||74||
kambugrīvā bhavedarcā sarvasiddhikarī sadā |
śarīraṃ siṃhasaṃsthānaṃ subhikṣabalabarddhanam ||75||
bhujau karikarākārau sarvakāmārthasādhakau |
śasyasampatkaraṃ nityaṃ sūdanaṃ ca subhikṣakṛt ||76||
rambhorucchāgagobṛddhirgrāmabṛddhiḥ supiṇḍikā |
supādā ca bhavedarcā śīlavidyāprasādhikā ||77||
ityarcānāṃ praśaṃsoktā hīnadoṣamathāha ca |
durbhikṣo rāṣṭrabhaṅgaḥ syād hīnā vistāradīrghayoḥ ||78||
dehahīnā bhavet kubjo nāsāhīnā ca rogikaḥ |
vāmadṛṣṭiḥ paśornāśa ūrdhvadṛṣṭirdhanakṣayaḥ ||79||
alpākṣī maṇḍalākṣī ca kekarākṣī tathaiva ca |
hīnadṛṣṭiradhodṛṣṭirdūrataḥ parivarjayet ||80||
nimnakukṣirbhavedarcā śasyanāśaṃ sadā bhavet |
uruhīnā bhavedarcā garbhaṃ patati śāśvatam ||81||
trayo hrasvā mahādoṣo nāsikā netramaṅguliḥ |
trayo dīrghā mahādoṣā jaṅghā grīvā cibustathā ||82||
trayaḥ sūkṣmā mahādoṣāḥ śiraḥ karṇañca nāsikā |
trayaḥ sthūlā mahādoṣāḥ sandhiḥ kukṣirnakhastathā ||83||
trayo nimnā mahādoṣā hastau pādau ca locanau |
trayo hrasvā mahādoṣā grīvāṃsau bhuja eva ca ||84||
iti doṣaguṇaṃ jñātvā kartavyārcā vipaścitā |
navatālalakṣaṇāyāmapariṇāhau saṃprakīrtitau ||85||
na ca vaktre dhruvaṃ deve aṣṭādvā devamānuṣā |
mānuṣyaṃ aṣṭatālaṃ ca jananyā cāṣṭasaptamam ||86||
mukhaṃ (śubhaṃ)ṣaṭsaptatālānāṃ pariṇāhe samucchrayam |
kīrtitā(taṃ)ca yathānyāyamātreyaṃ lakṣaṇanirmitamiti ||87||
dīrghaṃ cāṣṭamukhaṃ kṛtvā devīṇāṃ(nāṃ)lakṣaṇaṃ budhaḥ |
mukhaṃ ṣatkalaṃ kṛtvā dehaṃ caikādaśakalam ||88||
triya(striyāḥ)grīvāstanaścaiva aṅgau cucumukhāntarau |
sarve te mukhaṃ ma(mū)rddhā ca devīnāñca vidhīyate ||89||
madhyaṃ cāṣṭāṅgulaṃ kṛtvā sroṇī pañcakalā smṛtā |
kaṭī viṃśāṅgulaṃ kuryādurū caikādaśau kalau ||90||
jānunī a(trya)ṅgulā caiva piṇḍī vā viṃśadaṅgulā |
gulphaṃ dvyaṅgulaṃ kuryāddevīnāṃ lakṣaṇaṃ śubham ||91||
kṛtvā triṃśāṅgulaṃ caiva śirasi parimaṇḍalam |
pañcāṅgulaṃ bhujo mūlaṃ triguṇaṃ maṇḍalaṃ bhavet ||92||
tryaṅgulaṃ maṇibandhañca maṇḍalānāṃ tathaiva ca |
ūrumadhye kalāṣaḍbhistriguṇaṃ parimaṇḍalam ||93||
madhye pañcāṅgulaṃ jaṅgho maṇḍalaṃ triguṇaṃ bhavet |
sarvatra triguṇaṃ kāryamaṅgulīnāṃ tathaiva ca ||94||
apāṅgalocanañcaiva stanau tu kaṭireva ca |
īṣanmānādhikaṃ kuryādyena vṛ(dṛ)ṣṭisu(duḥ)khaṃ bhavet ||95||
||iti devīlakṣaṇam aṣṭatālasya ||
athātaḥ sampravakṣyāmi bālānāṃ mānalakṣaṇam |
ṣaḍguṇaṃ bālarūpīṇāṃ saināpatyañca ṣaḍguṇam ||96||
vināyakānāṃ yakṣāṇāṃ pratimālakṣaṇaṃ śubham |
golakaṃ mūrdhni vijñeyaṃ mukhaṃ ṣaḍgolakasya tu ||97||
grīvā dvyaṅgulaṃ kurvīta dehe viṃśāṅgulaṃ bhavet |
arddhagolakalā nābhyāṃ khanitaṃ tryaṅgulaṃ tathā ||98||
ūrū saptakalā kuryāt golakaṃ jānunī tathā |
piṇḍikaṃ ṣaṭkalaṃ kuryād gulphamekāṅgulaṃ smṛtam ||99||
pārṣṇikaṃ tryaṅgulaṃ caiva yathāvadanupūrvaśaḥ |
pādau pañcakalaṃ dīrghamaṅguṣṭhagolakaṃ tataḥ ||100||
sūcyaṅguṣṭhasamā kuryād dviyava [hīnā]madhyamā |
nakhahīnaṃ anāmañca parva(yava)hīnā kanīyasī ||101||
aṣṭāṅgulena hikkāso(to)bāhū caiva navāṅgulam |
prabāhū pañcagolañca karadīrghaṃ dvigolakam ||102||
madhyamāṅgulaṃ dvau golaṃ nakhahīnā pradeśinī |
madhyaṃ parvanakhāhīnaṃ kārayettadanāmikā |
anāmikāparva(yava)hīnā dīrghāṅguṣṭhakanīyasā ||103||
athātaḥ saṃpravakṣyāmi vistāreṇa kalāni ca |
dvikalārddhaṃ bhavenmūrdhni triguṇaṃ parimaṇḍalam ||104||
ṣaṭkalaṃ mukhamadhyaṃ ca karṇanāsāgrameva ca |
trikaraṃ(laṃ)grīvamadhye ca kukṣau tu ṣoḍaśāṅgulam ||105||
madhye ṣaḍgolaṃ kāyasya kaṭiñca saptagolakam |
ūrūmadhyacaturgolā jānudvikalaṣaḍyavam ||106||
madhye pañcāṅgulañjaṅghaṃ gulphaṃ tryaṅgulameva ca |
dvikalādvyaṅgulaṃ pādau vistāreṇa prakīrtitam ||107||
navayavāṅguṣṭhakaṃ caiva antaraṃ triyavaṃ smṛtam |
yavāṣṭasūcikaṃ kuryāt yavasapta ca madhyamam ||108||
ṣaḍyavānāmikāṃ yasya yavapañca kanīyasī |
evaṃ kārayate vidvānpādāṅgulasuśobhanam ||109||
tryaṅgulañca tathā pārṣṇi vistareṇa prakīrtitā |
aṣṭa cāṅguṣṭhakā caiva navasaptañca madhyamā ||110||
||iti ātreyatilake ṣaḍrūpalakṣaṇam ||
ataḥ paraṃ pravakṣyāmi daśatālasya lakṣaṇam |
brahmā ca carccikādevī ṛṣīṇāṃ brahmarakṣasām ||111||
divyānāṃ caiva buddhānāṃ kārayetpratimāṃ śubhām |
eteṣāṃ kārayedvidvān anyeṣāṃ naiva (caiva)kārayet ||112||
dvigolakaṃ bhavecchīrṣaṃ mukhaṃ ṣaḍgolameva ca |
grīvāṃ dvigolakaṃ kuryāddehaṃ ṣaḍviṃśamaṅgulam ||113||
nitambaṃ dvikalaṃ viddhi kaṭiḥ pañcakalaṃ bhavet |
ṣaḍ viṃśāṅgulakaṃ ūrū jānu pañcāṅgulau smṛtau ||114||
ṣaḍ viśāṅgulakau jaṅghau gulphau tryaṅgulakau smṛtau |
adho bhāgā prakartavyā pañcāṅgulasusaṃsthitā ||115||
bāhubhāgāḥ prakartavyā aṣṭagolakameva ca |
daśagolakavijñeyā prabāhū ca vipaścitā ||116||
karapallavabhāgañca ṣaṭkalaṃ tu vijānantuḥ(ta)|
eteṣāṃ ceṣṭamānānāṃ kartavyaṃ śāstracintakaiḥ ||117||
|| iti ātreyatilake daśatālalakṣaṇam ||
athātaḥ saṃpravakṣyāmi saptatālasya lakṣaṇam |
śiro tryaṅgulavijñeyaṃ mukhaṃ ṣaṭkalameva ca ||118||
grīvā tryaṅgulavijñeyā kambugrīvañca kārayet |
ūnaviṃśāṅgulaṃ devamānavṛttasuśobhitam ||119||
ekāṅguli nitambaṃ ca golaṃ [ca]kaṭideśakam |
ūnaviṃśāṅgulaṃ urūjānu tryaṅgulameva ca ||120 ||
ūnaviṃśāṅgulaṃ jaṅghaṃ gulphamekāṅgulaṃ matam |
tryaṅgulañca adhobhāgaṃ pratimā saptatālakam ||121||
aṣṭāṅgulaṃ prakartavyaṃ hikkā cāsyā(cāṃsā)grameva ca |
bāhū aṅgulivijñeyā ekatālaṃ prakīrtitam ||122||
prabāhūsaptagolakaṃ ca kartavyaṃ munisattama |
karapallavabhāgaṃ ca aṣṭāṅgulaṃ prakīrtitam |
mānuṣyapramāṇaṃ tu kartavyaṃ śāstracintakaiḥ ||123||
|| iti ātreyatilake saptatālalakṣaṇam ||
athātaḥ sampravakṣyāmi catustālasya lakṣaṇam |
ekāṅguliśiraḥ kuryāt mukhaṃ dvādaśamaṅgulam ||124||
grīvā ekāṅgulaṃ viddhi dehaṃ dvādaśamaṅgulam |
arddhāṅgulanitambaṃ ca kaṭimekāṅgulaṃ matam ||125||
navāṅgulaṃ bhavedūru jānū ekāṅgulaṃ smṛtam |
jaṅghā navāṅgulā jñeyā gulphamarddhāṅgulaṃ bhavet ||126||
adho bhāgā prakartavyā ekāṅgulaprakīrtitā |
catuḥkalaṃ ca vijñeyā hikkā cāsyā(cāṃsā)grameva ca ||127||
bāhū trigolakaṃ caiva prabāhū aṣṭamaṅgulam |
saptāṅgulamitaṃ jñeyaṃ ucchritaṃ karapallavam ||128||
yathāśobhena vijñeyā kartavyā māṃsavartanam(nī)|
vāmanasya pramāṇaṃ tu kathitaṃ munisattama ||129||
|| iti ātreyatilake catustālasya lakṣaṇam ||
mahāpratimāvinyāsaṃ pravakṣyāmyadhunā śṛṇu |
daśapañcādhikairhastaiḥ pratimā kanyasī smṛtāḥ ||130||
dviguṇā madhyamā jñeyā jyeṣṭhā tu triguṇā smṛtāḥ |
ataḥ paraṃ na kurvīta yadicchet śreyamātmanaḥ | ||131||
dagdhā jīrṇā ca bhagnā ca sphuṭitā cāpi devatāḥ |
sthitāvasthāpyamānā vā sadā doṣakarā bhavet ||132||
dagdhārcayā anāvṛṣṭirjīrṇārcayā dhanakṣayaḥ |
bhagnārcayā kule nāśaḥ sphuṭitā yuddhamādiśet ||133||
arccā vā yadi vā liṅgaṃ devī mātṛgaṇastathā |
śīghramutpāṭayedeva vidhidṛṣṭena karmaṇā ||134||
puṣpārghaṃ ca tathā dhūpaṃ naivedyaṃ balimeva ca |
dattvā ca vāsasī caiva homakarmasamanvitaḥ ||135||
vipraśāntyudakaṃ caiva veda(deva)mantreṇa kārayet |
bālarajju tathā mauñjaṃ dukūlakṣomakastathā ||136||
vidhirevaṃ samuddiṣṭaṃ rajju cātra vidhīyate |
vṛṣasya kakude baddhvā ākarṣejjīrṇadevatām ||137||
śailīmayī bhavedarccā tīrthe bahūdakeṣu ca |
nadīsaṅgamasaṃsthāne tasmiṃścaiva tu nikṣipet ||138||
sauvarṇaṃ rajataṃ caiva tāmraṃ raityamayīmapi |
drāvayedagninā sarvaṃ yadicchecchreyamātmani ||139||
dārumayī bhavedarcā navavastreṇa veṣṭayet |
ghṛtena madhunā snigdhaṃ dīptamagnau pradāpayet ||140||
pārthivī ca bhavedarccā yadi syānmṛṇmayīmapi |
bhūkhanitvā śiro mātre nyasettasmin prapūrayet ||141||
arccā [vā]yadi vā liṅgaṃ punaḥ śīghraṃ tu sthāpayet |
sarvalakṣaṇasampannā vidhidṛṣṭena sthāpayet ||142||
dvijaśca (jānāṃ)bālavṛddhānāṃ mānuṣāṇāṃ śubhāya ca |
rājā jayamavāpnoti śasyavṛddhikaraṃ bhavet ||143||
jīrṇoddhāraṇamarccānāṃ kṛtvā(taṃ)yena mahātmanā |
yugakoṭiśatasahasraṃ devaloke mahīyate ||144||
||ātreyatilake jīrṇoddhāraḥ samāptaḥ ||
pārthivī ca bhavedarccā yadi syānmṛṇmayīmapi |
bhūkhanitvā śiro mātre nyasettasmin prapūrayet ||141||
arccā [vā]yadi vā liṅgaṃ punaḥ śīghraṃ tu sthāpayet |
sarvalakṣaṇasampannā vidhidṛṣṭena sthāpayet ||142||
dvijaśca (jānāṃ)bālavṛddhānāṃ mānuṣāṇāṃ śubhāya ca |
rājā jayamavāpnoti śasyavṛddhikaraṃ bhavet ||143||
jīrṇoddhāraṇamarccānāṃ kṛtvā(taṃ)yena mahātmanā |
yugakoṭiśatasahasraṃ devaloke mahīyate ||144||
||ātreyatilake jīrṇoddhāraḥ samāptaḥ |